БИШКЕК, 17-сен. — Sputnik. Бала көтөрүп качып бара жаткан жеринен венгриялык журналисттин чалып жибергенинен сүрдүгүп барып жыгылган сириялык бозгун Испанияда жаңы жашоо баштай турганын Sputnik International жазды.
Окуя өткөн аптада сириялык качкындарды Венгриянын атайы лагерине бөлүштүрүү учурунда болгон.
Журналисттин орой мамилесине дуушар болгон качкын Осам Абдул Мохсенге Испанияда футбол машыктыруучусу болуп иштөөнү сунушташты. Мохсен уулу менен Сербия менен чектешкен жердеги качкындардын лагеринде полициядан качкан ондогон бозгундардын катарында эле.
Чуулгандуу видеодон кийин германиялык маалымат каражаттары жарандык согушка чейин Мохсен футболдук команданын машыктыруучусу болуп келгенин жазып чыгышкан. Мохсендин оор абалда калганын билгенден кийин Испаниянын машыктыруучуларды даярдоо улуттук борбору ага жардам берүүнү чечкен.
Ага ылайык, борбор качкын жана анын үй-бүлөсүнө Испаниядан баш паана алуусуна көмөктөшүүгө аракет кылат.
