БИШКЕК, 15-июнь — Sputnik. Тбилисидеги суу ташкынынан каза болгон адамдардын саны 12ге жеткенин РИА Новости шаардын мэри Давид Нарманиянын айткандарына таянуу менен маалымдайт.
Ишембиден жекшембиге караган түнү нөшөрлөгөн жаан мөндүр менен коштолуп, суу ташкыны адам өмүрүн кыйды. Кырсык кесепетинен турак үйлөрдү суу каптап, жолдор, инфраструктура объектилери бузулду. Мындан тышкары, шаардагы зоопарк жабыркап, андагы 600дөн ашуун жаныбардын теңи кырылган. Шаарды аралап кеткен арстан, аюу, карышкырлар атып өлтүрүлгөн. Калганы коопсуз жайга көчүрүлдү.
"Куткаруу иштеринин биринчи этабы аягына чыкты, бирок аракеттер токтогон жок. Учурда набыт болгон адамдардын саны 12ге жетти. Биз алардын үй-бүлөлөрүнө терең кайгыруу менен көңүл айтабыз", — деди Нармания.
Анын айтымында, күндүн акырына чейин кырсыктан улам шаар тургандарына жана калаа инфраструктурасына келтирилген зыяндын көлөмү аныкталат.
Маалыматка ылайык, жок кылынган жаныбарлардын ичинде сейрек кездешүүчү Шумба аттуу ак арстан да бар. Буга чейин зоопарктын директору Зураб Гуриелидзе кырсык учурунда качып кеткен жаныбарлар негизсиз атылганын билдирип чыккан.
"Эгер жырткыч адамга кол салса, анда атылышы жөндүү. Бирок жаныбарларды атууга буйрук болгон эмес, айрымдар өз укугун ашкере пайдаланып жиберишти", — деди директор.
Ал эми мэрия кызматкерлери зоопарк толугу менен кыйраганын, учурда тазалоо иштери жүрүп жатканын билдирди.
Тбилисидеги катуу жааган жамгырдын кесепеттерин жоюу үчүн премьер-министр Ираклий Гарибашвилинин буйругу менен өзгөчө кырдаалдар штабы түзүлүп, аны өкмөттүн мамлекеттик коопсуздук башкармалыгы боюнча Кеңеш башкарууда.
