БИШКЕК, 13-янв — Sputnik. Өткөн жылдын апрель айында Бостондо болгон терракты иликтөөгө тоскоолдук кылган деп айыпталып жаткан Кыргызстандын жараны Хайрулложон Матанов өзүнүн күнөөсүн мойнуна ала турган болуп калды деп РИА Новости билдирди.
NBC телеканалы билдиргендей, Матановдун жактоочусу федералдык прокурор менен биргеликте соттук угуу күнүн белгилөө үчүн дүйшөмбүдө сотко өтүнүч кат менен кайрылды.
Мурдагы жылдын июнь айында Бостондогу федералдык соттун угуусунда Матанов бардык пунктар боюнча өз күнөөсүн моюнга алган. Прокуратура Матановду тергөөнүн жыйынтыктарына олуттуу жардам бере турчу маалыматтарды өчүрүү, аны жасалмалоо боюнча айыптап жатат. Сот буга чейин Матановду күрөөгө коё берүүдөн баш тарткан. Эгер сот Матановду күбө боло турчу маалыматтарды өчүргөнү үчүн күнөөлүү деп тапса, ал 15 жылга чейин эркинен ажыратылышы ыктымал.
АКШнын Бостон шаарындагы терракт 2013-жылдын апрелинде марафон учурунда болгон. Эки жардыруунун кесепетинин 3 киши каза болуп, 260дан ашык киши жаракат алган. Бул терракты уюштурган деп ага-ини Царнаевдер айыпталып жатат. Туугандардын улуусу Тамерлен полиция менен атышуу маалында мерт кеткен. Ал эми Жохар атайын операция учурунда кармалган. Ал 30 пункт боюнча айыпталууда, анын 17 пунктунда өтө катаал жазалар – өлүм жазасы каралган.
Царнаевден башка жардырууга катыштыгы бар деп үч киши айыпталууда. Алар: Казакстандын жараны Азамат Тажаяков жана Диас Кадырбаев, ошондой эле америкалык Роберт Филиппос да бар.
