Атамбаев ГЭСтердин курулушу тууралуу: башка инвесторлорду издейбиз

Жазылуу
Россия Жогорку Нарын каскадына жана Камабар-Ата – 1 ГЭСтерин куруу боюнча келишимди аткара албай турганын Алмазбек Атамбаев жыл жыйынтыгы боюнча берген маалымат жыйында билдирди.

Өлкө башчынын айтымында жүйөөлүү себептерден улам Россия өз милдеттерин аткара албайт.

"Россиянын учурдагы экономикасынын абалы аталган макулдашууну аткара албай турганын далилдеп турат. Бул жерде Россияны да күнөөлөө болбойт. Кыргызстан бул макулдашуудан чыгып, башка инвестор издеши керек окшойт. Абалга көз салып турабыз, бирок кээ бир учурда кескин чечимдерди кабыл алууга туура келет", — деди өлкө башчы.

Атамбаев маалымат каражаттары мындан кандайдыр бир саясий боек издей башташы мүмкүн экенин айтты. 

"Путин — реалист, ал баарын көрүп турат. Бул мен үчүн да аябай өкүнүчтүү нерсе. Кийинки жылы Жогорку Нарын каскады ишке кирерине абдан ишеним арткам. Биздин да күнөөбүз бар, Россиянын болуп-толуп турган кезинде жер бөлүп берүү маселесин кечеңдетип койдук", — деди Атамбаев.

Жогорку Нарын каскадынын курулушу суу-энергетикалык объектилерди куруу үчүн Нарын облусунда жер бөлүп берүүдөгү кыйынчылыктардан улам токтоп калган. 

Жогорку Нарын каскадына гидроэлектрстанцияларды куруу Кыргызстан менен Россия өкмөттөрүнүн ортосундагы 2012-жылдын 20-сентябрында макулдашууга жетишилген.

Жаңылыктар түрмөгү
0