БИШКЕК, 9-окт. — Sputnik. Кыргызстандык Чынарбек Изабеков Польшада өткөн күрөш боюнча ардагерлер арасындагы дүйнө чемпионатында алтын медалга ээ болгону Күрөштүн бириккен дүйнөсүнүн сайтында жарыяланды.
Изабеков 46-50 жаш курак чегинде 97 килограммга чейинки салмак категориясында күч сынашты.
Жарым финалдык беттеште Изабеков польшалык Иренеузу Пепловский менен беттешип, атаандашын 7:0 эсебинде таза жеңиш менен утуп алган. Ал эми чечүүчү кармашта молдовалык Валерий Заболотный менен килемге чыгып, 8:0 эсебинде жеңилип калды.
Ал эми буга чейин ушул эле биринчиликте ИИМдин мурунку жетекчиси Мелис Турганбаев коло медаль үчүн польшалык Сильвестр Петро Сзыманский менен беттешип, 11:0 эсебинде жеңишке жетишти.
Күрөш боюнча ардагерлер арасындагы дүйнөлүк турнир 7-октябрь күнү Польшада башталып, 9-октябрга чейин уланат.
