БИШКЕК, 16-сен. — Sputnik. Рио-де-Жанейро шаарында өтүп жаткан Паралимпиада оюндарында кыргызстандык Арстанбек Базаркулов найза ыргытуу боюнча тогузунчу орунду ээлегин мелдештин расмий сайтында маалымдалды.
Эске сала кетсек, Базаркулов буга чейин чоюн ыргытуу боюнча мелдешке чыгып, анда да тогузунчу орунду алса, ага чейин таймашка чыккан Эсен Калиев пауэрлифтинг боюнча бешинчи орун алган.
КР өкмөтүнүн токтомуна ылайык, Паралимпиада оюндарында биринчи орундан сегизинчи орунга чейин алгандарга акчалай сыйлык каралган. Ага ылайык, алтын медаль үчүн 7 миллион сом, күмүш үчүн 5 миллион, коло үчүн 3,5 миллион сом берилет. Ал эми төртүнчү орун — 2 миллион, бешинчи орун — 1 миллион, алтынчы, жетинчи, сегизинчи орун үчүн 900 миң, 800 миң жана 700 миң сомдон берилет.
Ал эми Рио-де-Жанейрого Кыргызстандан Эсен Калиев, Жыргалбек Орозбаев (пауэрлифтинг) жана Арстанбек Базаркулов (жеңил атлетика) барган. Паралимпиада оюндары — ден соолугу боюнча мүмкүнчүлүгү чектелген жарандарын спорттук мелдеши. Мында спорттун 22 түрү боюнча 528 медалдын комплектиси ойнотулат.
