ЧОЛПОН-АТА, 7-сен. — Sputnik. II Дүйнөлүк көчмөндөр оюндарынын алкагында өтүп жаткан көк бөрү турниринде Кытайдын "Ала-Тоо" командасы үчүнчү орунду ээледи.
Аталган команда менен Башкыртстандын көк бөрүчүлөрү 3-орун үчүн ойноп, кытайлыктар тай казанга 18 ирет улак таштаса, россиялыктар болгону эки гана жолу өзгөчөлөнүштү. Ошентип 18:2 эсеби менен "Ала-Тоо" командасы үчүнчү орунду алса, Россиянын Башкыртстанынан келген оюнчулар 4-орунду камсыздашты.
Эске сала кетсек, финалдык беттештер эртең, 8-сентябрда болот. Анда кыргыз спортчулары менен Казакстандан келген көк бөрүчүлөр күч сынашат.
Көчмөндөр оюндары 8-сентябрь соңуна чыгат.
Sputnik Кыргызстан маалымат агенттиги жана радиосу Дүйнөлүк көчмөндөр оюндарынын расмий медиа өнөктөшү болуп саналат.
