БИШКЕК, 6- сен — Sputnik. Бүгүн Бишкекте өтүүчү Кыргызстан жана Филиппин футболчуларынын ортосундагы жолдоштук беттешүүнү ден соолугу боюнча мүмкүнчүлүгү чектелген балдар ачат. Бул тууралуу БУУнун Балдар фонду(ЮНИСЕФ) билдирди.
Мааламатка ылайык, бул оюн мүмкүнчүлүгү чектелген балдардын укугун коргоого арналат. Реабилитациялык борбордун тарбиялануучулары буга чейин улуттук команданын футболчулары үчүн концерт коюп беришти.
"Демилгенин максаты — коомдун көңүлүн балдардын укугун коргоо маселесине буруу жана өспүрүмдөрдүн жетилүүсү үчүн спорттун пайдалуу экендигин далилдөө болуп саналат. Кыргызстанда 2 миллиондон ашык бала бар, анын ичинен 28 миңи — майыптар. Алар көп ирет инклюзивдик билим жана медициналык кызмат жагынан чектөөгө кабылышат", — деп айтылат билдирүүдө.
Кыргызстан БУУнун балдардын укугу жөнүндөгү Конвенцияны 1994-жылы ратификациялаган.
