БИШКЕК, 28-май — Sputnik. Кыргызстандык тайбоксчу Мирбек Сарткалмаков Швецияда өткөн дүйнө чемпионатында күмүш медалга ээ болду. Бул тууралуу Sputnik Кыргызстан агенттигине Тай боксу боюнча федерациянын президенти Елена Шевченко билдирди.
Аталган мелдешке Кыргызстандан үч спортчу барган.
Финалдык беттеште Сарткалмаков вьетнамдык спортчу менен кездешип, алтын медаль үчүн болгон кармашта утулуп калды. Буга чейин кыргызстандык Рафаэль Физиев коло медалга ээ болгон. Дагы бир тайбоксчу Бекжан Матисаев алгачкы беттештерде эле таймаштан четтеп калган.
"Өлкөнүн атынан үч спортчу барып, эки медаль тагынып кайтышты. Бул жакшы жыйынтык. Көп спортчу менен барып, бир да медаль тагынбаган мамлекеттер арбын болду", — деди Шевченко.
Анын айтымында, эми кыргызстандык команда октябрда Вьетнамда өтө турган Азиянын пляж оюндарына даярдык көрөт.
