БИШКЕК, 26-апр. — Sputnik. Кыргызстандын өспүрүм кыздарынан куралган футбол командасы Азиянын аймактык чемпионатын жеңилүүдөн баштады. Бул тууралуу Футбол федерациясы билдирди.
Аталган чемпионат Тажикстанда шейшемби күнү башталып 1-майга чейин уланат. Алгачкы оюнда кыргызстандык кыздар Бутандын командасы менен беттешти. Биринчи таймда бутандыктар эки топ киргизсе, улуттук курамадагы Айана Кемелбаева бир гол менен жооп кайтарды. Оюн 2:1 эсебинде бутандыктардын пайдасына аяктады.
Мелдешке эки тайпага бөлүнгөн жети команда катышууда. "А" тайпасына Тажикстан, Кыргызстан, Бутан жана Иран командалары кирген. Ал эми "В" тайпасында Бангладеш, Непал жана Индия командалары бар.
Азиянын аймактык чемпионаты жети мамлекеттин футболдук командаларынын бирикмеси болуп саналат. Чемпионат фестиваль иретинде өтүп, ага командалар каалоосу боюнча гана катышат. Мелдеш башка турнирлер үчүн квалификациялык турнир болуп саналбайт.
