БИШКЕК, 26-окт. — Sputnik. "Алай" футболдук командасы 25-октябрь күнү Ош шаарынын Сүйүнбаев атындагы борбордук стадионунда Нарындын "Ала-Тоо" командасын 3:2 эсебинде жеңип алды.
Оюндун 1-бөлүгүндө "Алай" командасынын оюнчусу Ильяз Алимов эки гол киргизип, оюн 2:0 эсебинде жыйынтыкталды. Экинчи бөлүгүндө Нарын шаарынын "Ала-Тоо" командасынын оюнчулары эки гол киргизип, эсепти теңеген.
"Алайдын" оюнчусу Алия Силла кийинки чечүүчү топту атаандаштарынын дарбазасына киргизди. Ошентип, оюн 3:2 эсебинде жыйынтыкталып, Оштун "Алай" командасы жеңишке жетти.
Футболдук беттешти көрүүгө Ош шаарынын мэри Айтмамат Кадырбаев, жергиликтүү бийлик өкүлдөрү жана футбол күйөрмандары келишти.
"Биздин оюнчулар абдан татыктуу, мыкты оюн көрсөттү. Шаардыктар үчүн бул жеңиш чоң белек. "Алай" футболдук командасы Кыргызстандын чемпиондугун татыктуу утуп алды", — деди Кадырбаев.
"Алай" командасынын башкы машыктыруучусу Андрей Власичев бул жеңиш оюнчулардан калаа күнүнө карата шаардыктарга болгон белек деп билдирди.
