БИШКЕК, 19-янв. — Sputnik. Кыргызстандын Ички иштер министрлиги Boeing-747 учагы кулаган жерде мародерлукка шектелген жаран кармалгандыгы тууралуу социалдык тармакка жана айрым ЖМКларга тараган маалымат чындыкка коошпой турганын билдирди.
ИИМ тараткан билдирмеде мындай маалыматтарды жарыялаган адамдар коомчулукту адаштырууга аракет жасагандар экени айтылат.
"Интернет булактарында камакка алынган киши үй-бүлөсүнөн ажырап калган адамдын бир тууганы экени айтылган. Ал челекке документтер менен белек-бечкектерди салып келе жатканы айтылат. Бул маалымат чындыкка такыр коошпойт. Авиакырсык болгон жер күч кызматкерлери тарабынан толугу менен тосулган болчу. Морадерлукту болтурбоо үчүн аймак күнү-түнү кайтарылган", — деп айтылат маалыматта.
"Ал киши буюм салынган челекти ага байкеси берип унаага алып барууну суранганын билдирген. Кийин ошол байкеси өзү келип туугандарынын биринин эки кызы кырсыктан каза тапканын айткан. Маселе такталгандан кийин ал адамдар кое берилген. Мародерлук фактысы катталган жок", — деп айтылат маалыматта.
Мындан тышкары, ИИМ жергиликтүү төрт жаран учактан түшүп калган буюм-тайымдарды чогултуп милиция кызматкерлерине тапшырышканын белгиледи. Окуя болгон жерде коңшу айылдын тургуну тарабынан уурулук жасоо аракети катталган. Бул факты боюнча тергөө иштери уланып жатат.
