БИШКЕК, 17-янв. — Sputnik. Россиянын Саратов облусундагы жол кырсыгынан каза болгон кыргыз жарандарынын сөөгүн таануу үчүн жакындары жөнөп кеткендигин КРдин Мамлекеттик миграция кызматынан билдиришти.
Жүк ташуучу унаанын айдоочусу кармалган. Алдын ала маалыматтарга караганда, ал уктап кетиши мүмкүн экендиги айтылган.
Россияда бул кырсык боюнча кылмыш иши козголду.
"15-январда болгон жол кырсыгын иликтөө иштеринин алкагында Миграция кызматынын өкүлү иштеп жатат. Учурда каза болгондордун сөөгүн таануу үчүн жакындары жөнөп кетишти", — деп айтылат билдирүүдө.
Маалыматка караганда, Айдарбек Молдошев, Жазгүл Касымова, Алмазбек Анашев жана Дөөлөтбек Борошев аттуу жарандар каза болгон.
Учурда маркумдардын сөөгүн Кыргызстанга жиберүү боюнча даярдык иштери жүрүүдө.
