БИШКЕК, 24-дек. — Sputnik. Бишкек — Ош жолунан жеңил автоунаалар өтүп баштаганын ӨКМ билдирди.
Маалыматка ылайык, 24-декабрда түнкү саат 01:00дө Бишкек — Ош унаа жолунун "Сосновка" постунан жеңил унааларга коюлган чектөө алынып, өтүп баштаган.
"Түнкү саат 1:50 чамасында "Арал" жана Кара-Көл шаарындагы посттон жеңил автоунаалар үчүн киргизилген чектөө алынып, өтүп башташты", — деп айтылат маалыматта.
Ал эми оор жүк ташуучу автоунаалар үчүн "Сосновка" жана "Арал" постунан чектөө алына элек.
23-декабрда "Сосновка" постунда жеңил жана жүк ташуучу автоунааларга чектөө киргизилип, 300дөй автоунаа токтоп калган. Алардын айдоочулары үчүн ӨКМ атайын жай уюштуруп, ысык тамак берген болчу.
