БИШКЕК, 3-дек. — Sputnik. Сегиз жашында электр тогуна урунуп эки колунан ажыраган Ноокен районунун тургуну Назиржан Тайлаков учурда райондун ишеничтүү, беделдүү программисти. Биздин кабарчылар ноокендик бул жигитке барып, жолугуп, маектешип кайтты.
Жергиликтүү жарандар бузулган компьютерлерин Назиржанга келип, оңдотуп кетишет. Башка аймактардагылар "ноокендик программист" деп атап коюшат.
Калемди тиштеп жазып, ызалуу күндөрдү башынан өткөргөн Назиржан мектепти кызыл күбөлүк менен аяктаган. Ош мамлекеттик университетке тапшырып, бир жылдан соң үй шартына байланыштуу окуусун таштоого аргасыз болуптур…
Анткен менен Назиржан адеп сүйлөшө баштаганыбызда бардык ийгилигинин башатында анын апасы тургандыгын баса белгиледи.
"Мектепте 4-класстан баштап калемди тиштеп алып жазчумун. Апам ар дайым окугун, мени башкалардын алдында уят кылбагын деп талапты катуу коё турган. Албетте, башкалар шылдыңдаган кундөр деле болду, бирок кийин мазактагандарга көңүл бурбаганга аракеттендим. Азыр эч нерсеге өкүнбөйм", — деди "ноокендик программист".
Назиржандын апасы Мавлюда Режевалиева да башка ата-энелер сыяктуу өз баласынын жашоодо бактылуу болушун тилейт.
26 жаштагы Назиржан уй-бүлөдө да негизги жардамчы. Програмисттик ишинен сырткары уй иштерине кол кабыш кылганга да убакыт табат.
Биз менен сүйлөшүп отуруп, ал өкмөттөн бөлүнгөн майыптык пенсиянын көзүн карап калбай тургандыгын айтты.
"Биринчи топтогу майыптыгым үчүн 3000 сом пенсия берет, бирок аны эле карап калбайм. Өзүм иштеп жатам. Башкаларга пайда келтирип, алардын иштеп, оокат кылып кеткенине жардам бергениме каниет кылам", — деген Назиржандын кайратына баа бербей коё алган жокпуз.
Баса, биздин каармандын учурда 10дон ашуун шакирттери бар. Назиржандын үйрөткөн билиминин арты менен алардын көпчүлүгү учурда жумуш менен камсыз болушкан.
