БИШКЕК, 22-ноя. — Sputnik. Бир жумадан кийин Бишкекте "Мырк" брендинин алдында тигилген кийим-кече сатыла баштайт. Бул боюнча Sputnik Кыргызстан агенттигине дизайнер жана идеянын автору Кадыр Батырканов билдирди.
"Негизги идея – М тамгасынан алынган, ал BMWнын бир бөлүгү – мотоспорт. Биздин шаарда унаасын жол эрежелерин бузуп айдаганды жакшы көргөн жигиттер темир тулпарынын үлгүсү кайсы экенине карабай, ушул белгини чаптап алышат. Эл арасында буларды "мырк" деп коюшат. Биз тамаша иретинде ушундай брендди тартып койгонбуз. Интернетке жарыялаган түнү эле абдан көп каалоочулар бар экени белгилүү болду. "Мырк" деген жазуусу бар кийимди кийгиси келгендер көп экен. Азыр өндүрүүчүлөр менен иштешип атабыз, эмки жумада ушундай аталыштагы кийимдерди сата баштайбыз", — дейт Батырканов.
Ал "мырк" деген сөзгө позитивдүү боек сүртүп, атургай аны модага айланткысы келерин айтты.
Анын айтымында, биринчи кезекте сатыкка "Мырк" деген жазуусу бар калың жемпир жана футболкалар чыгарылат.
