БИШКЕК, 22-ноя. — Sputnik. "Тумар" бий тобу Чехияда өтө турган "Чехия жана Словакия таланттарды издейт" эл аралык конкурсунда баш байге үчүн ат салыша турганын топтун жетекчиси Эрмек Кадыров Sputnik Кыргызстан агенттинини мультимедиалык маалымат борборунда болгон жыйында билдирди.
Буга чейин аталган топ аталган сынактын финалына түз жолдомо алышкан. Топтун катарында майып балдар да бар. Алар чимирилип бийлеп, башка кишилер кыла албаган нерселерди жасай алышат.
"Эки жылдан бери бул конкурска катышуу үчүн сүйлөшүүлөрдү жүргүздүк. Былтыр чакырышкан, бирок демөөрчү таба алган эмеспиз. Бирок конкурстун уюштуруучулары бардык чыгымды өздөрүнө алган. Калыстардын бирөө "силердин өнөрүңөрдү бүт дүйнө көрүшү керек" деп аябай толкунданган", — деди Кадыров.
Анын айтымында, топ 24-ноябрда учуп кетет. Конкурстун финалы 27-ноябрда өтүп, СМС добуш берүүнүн жыйынтыгы бир күндөн кийин белгилүү болот.
Кадыров топтун жеңишке жетүү мүмкүнчүлүгү жогору экенин айтты. Ошентсе да Чехия менен Словакияда жашагандар арасында терс пикирлер да бар дейт.
"Мисалы, Кыргызстандын атынан биздин жана Атай Өмүрзаковдун командасы катышып жатат. Андан сырткары, Англия сыяктуу башка мамлекеттерден келишкен. Андыктан конкурс "Чехия жана Словакия таланттарды издейт" деп аталса эмнеге башка мамлекеттерден келип катышат деп нааразы болгондор дагы бар. Ошол эле учурда биздин бийди көргөндөр жакшы пикирлерин да айтууда. Андыктан жеңишке жетүүгө шанс бар", — деди ал.
Конкурстун байге фонду 50 миң евро. Сынактын буга чейинкисин кыргызстандык Атай Өмүрзаков жеңип алган.
"Тумар" бий тобу 2009-жылы негизделген. Анда балдардын "Үмүт — Надежда" реабилитациялык борборунун тарбиялануучулары бийлейт. Аталган бий тобу буга чейин бир катар ири конкурстарга катышып, байгелүү орундарды камсыздаган.
