БИШКЕК, 21-окт. — Sputnik. Ысык-Көл облусунун Ак-Суу районундагы Теплоключенко айылында башка динди тутунган аялдын сөөгүн жерге берүүдө айылдыктар каршы чыкканын облустун казысы Алмаз Сагындыков Sputnik Кыргызстан агенттигине билдирди.
Алдын ала маалыматтар боюнча маркум 60 жашта жана христианчылыктын баптист багытын карманып келген.
"Маркумдун бүгүн түштөн кийин каза болгонун айтышты. Айыл тургундары анын сөөгүн жергиликтүү мусулмандардын мүрзөсүнө көмүүгө каршы болушкан. Бүгүн кеч кирип кеткендиктен бул маселе боюнча айылдын тургундары кеңешип, бир пикирге келе алышкан эмес. Эртең жергиликтүү бийлик менен да сүйлөшүүлөр болот", — дейт облус казысы.
Сагындыков башка диндин өкүлдөрү үчүн Тоң районундагы Кажы-Сай айылында атайын жер берилгенин кошумчалады.
"Облус аймагында башка динди тутунгандардын сөөгү Кажы-Сай айылындагы жерге коюлуп келген", — деди ал.
Облус казысы башка динди тутунгандарды жерге берүү маселеси 2000-жылдан бери эле болуп келе жатканын белгиледи.
Ал ошондой эле маркумду жерге бердирбөө маселесин молдолор эмес, жергиликтүү тургундар көтөрүп жатканын баса белгиледи.
Белгилей кетсек, буга чейин да Жалал-Абаддын Ала-Бука районунда ушундай окуя катталган. Анда 76 жаштагы кемпирдин христианчылыктын баптист багытын карманып келгени айтылып, үч жолу жерге берилген болчу.
