БИШКЕК, 12-окт. — Sputnik. 6-7 жаштагы кичинекей балдарды сүрөөнгө алып, канжалата мушташтырып жаткан видеодогу балдардын аталары Өзгөн райондук милициясы тарабынан убактылуу кармоочу жайга киргизилди. Бул туурасында ИИМдин маалымат кызматынын өкүлү Эрнис Осмонбаев Sputnik Кыргызстан агенттигине билдирди.
Буга чейин Кыргызстандагы социалдык тармактарга кичинекей балдардын бири-бирин уруп, канжалата мушташып, ал эми аларды чоңдордун кубаттап турган видеосу тараган.
Милиция видеодогу балдардын жана кишилердин ким экендигин 8-октябрда аныктап чыкты. Окуя Өзгөн районундагы Баш-Дөбө айылында болгон.
"Балдарды мушташтырып жаткан чоңдор ошол балдардын аталары болуп чыкты. Бул факты аныкталгандан кийин бүгүн Өзгөн райондук милициясы тарабынан ал эки киши убактылуу кармоочу жайга киргизилди", — деди ИИМ өкүлү Осмонбаев.
"Окуя жай айында болгондугу аныкталды. Маалыматтарда алар бир көчөдө жашаган айылдаштар болуп чыкты. Видеого тартып алып, бирөөсүнүн атасы мактаныч катары көрсөтүп жүргөн. Учурда тергөө иштерин Өзгөн райондук ИИБдин кызматкерлери да жүргүзүп баштады", — деди Осмонбаев.
ИИМ өкүлү балдар мектеп босогосун жаңы аттаган — бири 6, бири 7 жашта экендигин кошумча билдирди.
