БИШКЕК, 5-окт. — Sputnik. Эгер муктаждык жаралса турак жайларга жылуулук 1-ноябрга чейин берилиши мүмкүн экенин калаа башчысы Албек Ибраимов билдирди.
Мэриянын маалымат кызматы кабарлагандай, Ибраимов шаардагы казан мештердин жылытуу сезонуна карата даярдыгы боюнча жыйын курду.
ЖМК өкүлдөрү "Ботсад", "Факел" жана "Бишкекжылуулукэнерго" ишканаларынын казан мештеринин абалы менен таанышты.
"Бишкек шаарында жылытуу сезонун баштоо жөнүндөгү" буйрукка ылайык, сыртта беш күн бою абанын температурасы 8 градустан төмөн болгону катталса, жылуулук бериле баштайт.
Ошондой эле, журналисттерге "Бишкекжылуулукэнерго" коммуналдык ишканасынын карамагында 60 казан меш бар, алардын 24ү газ менен, 22си көмүр, 11и электр энергиясы жана 3 казан меш аралашкан отун менен иштейт.
Ишкана ысык суу менен 28 миңден ашык кишини жана 525 турак үйдү, 56 билим берүү 12 саламаттык сактоо мекемесин камсыздайт. Ошондой эле 19 бюджеттик жана 95 коммерциялык ишканалар бар.
