БИШКЕК, 2-окт. — Sputnik. Жыл сайын октябрдын биринчи жекшембисинде мугалимдердин күнү майрамдалып келет.
Биздин мугалимдердин айлык маянасы өтө чоң эмес. Бирок ага карабастан алардын көпчүлүгү өмүрүнүн тең жарымын балдарга билим берүүгө арнашат. Кыргызстанда ар бир мугалимге болжол менен 14-16 окуучу туура келет.
Sputnik Кыргызстан агенттиги мугалимдердин агартуучулук кесиби тууралуу ой пикирлери менен бөлүшүүнү туура көрдү.
Антонида Зырянова орус тили жана тарых сабактары боюнча Маевка айылындагы №1 мектепте сабак берет. 55 жылдык эмгек тажрыйбасы бар.
"Пенсия курагына келгеним менен сабак берүүнү токтоткон жокмун. Мугалимдик кесипти көптөн бери иш катары эсептебей калгам. Себеби бул менин жашоо образым. Ал эми окуучулар менин балдарым", — деди мугалим.
Кыялбек Акматов кыргыз тил жана адабияты боюнча Оштогу Алишер Навои атындагы гимназияда сабак берет. Эмгек тажрыйбасы 15 жыл.
"Мектепте беш жыл бир жылдай эле өтүп кетет. Ушунча убакыт кандайча өтүп кеткенин байкабай деле калдым. Мен мугалим болуу менен чектелбестен балдарга акыл айтып, кээде досу дагы болуп берем. Ошол себептен ар дайым үлгүлүү болууга аракет жасайм. Себеби окуучулар мугалими менен сыймыктанып турса жакшы да", — деп билдирди Акматов.
Марина Галкина Чүй облусундагы Ленин айылындагы мектепте тарых сабагынан мугалим. 25 жылдык тажрыйбасы бар.
"Негизи балдар менен күн өткөрүү кызыктуу, бирок оңой дагы эмес. Себеби окуучулар ар күн сайын сабакка даярданып келишпейт. Анткен менен билим алууларына колдон келген жардамды көрсөтүп келем", — дейт Галкина.
Кыздархан Перханова Баткен облусуна караштуу Кадамжай районундагы №17 Масалиев атындагы мектепте кыргыз тили жана адабият сабагынан мугалим. 32 жылдан бери эмгектенет.
"СССР убагындагы окуучуларга караганда азыркылар кыйла өзгөрүштү. Компьютер, гаджеттер…Бирок балдардын көңүлүн сабакка бөлүү менин милдетим. 32 жылдык тажрыйба оңой эмес. Бул жылдар аралыгында балдарды түшүнүүгө жетиштим", — дейт Перханова.
Марина Талканбаева Бишкектеги №29 мектепте башталгыч класстарга чейинки балдарга сабак берет. 6 жылдык эмгек тажрыйбасы бар.
"Балдарды жакшы көрүш керек. Антпесе бул иште көпкө чыдоого мүмкүн эмес. Эреже жөнөкөй, балдарды жакшы көрсөң алар дагы сени жакшы көрүшөт" — дейт Талканбаева.
Аида Таалайбек кызы кыргыз тили жана адабиятынан сабак берет. 18 жылдык тажрыйбасы бар. Ал Нарын облусундагы Ат-Башы районундагы Талкан Керималиев атындагы мектепте сабак берет.
"Мен бул кесипти тандап алганыма эч качан өкүнгөн жокмун. Балдар менен иш алып баруу мага дем күч берип келет. Мына азыр менин балам, менин окуучум Олимпиададан биринчи орунду алып келди. Бул окуучум экөөбүздүн жеңишибиз", — деп кубанды Таалайбек кызы.
Тамара Грошева Лебединовка айылындагы №2 мектептин башталгыч класстарына сабак берет. 11 жылдык тажрыйбага ээ.
"Балдарды билимге кызыктуруу үчүн ар качан жаңы оюндарды ойлоп табуу зарыл. Алар менен карып кетүү мүмкүн эмес. Себеби балдар жаштыктын эликсири", — дейт Грошева.
