БИШКЕК, 27-сен. — Sputnik. Алмазбек Атамбаев жүрөк аритмиясына чалдыкканын президенттин маалымат кызматы билдирди.
Ага ылайык, Атамбаев РФ президентинин иш башкармалыгынын Москвадагы борбордук клиникалык ооруканасында дарылануусун улантып жатат.
"Андан сырткары, президент 2008-жылы ууланганда анын кызыл өңгөчүнө Түркияда операция жасалган. Борбордук клиникалык ооруканада дарыгерлер тарабынан анын кызыл өңгөчүнө профилактикалык изилдөө жүргүзүлдү", — деп айтылат билдирүүдө.
Дарыгерлер Атамбаевдин абалы канааттандырарлык экенин жана апта аягында ооруканадан чыга турганын айтышууда.
Эске салсак, Атамбаев 19-сентябрь күнү Нью-Йоркто өтүүчү БУУнун Башкы Ассамблеясынын сессиясына баратып, Стамбулдан өзүн жаман сезип, аны тез жардам алып кеткен. Андан соң Түркиянын Измир шаарындагы мейманканалардын бирине жайгашкан. Ал эми 23-сентябрда өлкө башчысы ден соолугун чыңдоо үчүн Москва шаарына учуп келген болчу.
