БИШКЕК, 19-сен.— Sputnik. Кыргызстандан Нью-Йоркко кетип бараткан учурда президент Алмазбек Атамбаевдин саламаттыгы начарлаганынан улам делегация Стамбулга конууга аргасыз болуп, медициналык алгачкы кароо жасалды. Бул туурасында президенттин маалымат кызматынын жетекчиси Алмаз Усенов Fcebook баракчасына жазды.
Маалыматта учакта баратканда Атамбаевдин жүрөк тушу ооруп, өзүн жаман сезгени айтылат
Дарыгерлер карагандан кийин президент Атамбаевдин медициналык кароодон тереңирээк өтүшү зарылдыгы белгиленген.
"Алдын ала маалыматтарда дарыгерлер мамлекет башчысынан жүрөк оорунун белгилерин тапкан. Мындан улам Атамбаев медициналык кароодон өтүп, бир канча күн медиктердин көзөмөлүндө болот", — деп жазды Усенов.
Эске сала кетсек, Атамбаев баш болгон кыргызстандык делегация Нью-Йорк шаарына Бириккен улуттар Уюмунун Башкы ассамблеясынын 71-жыйынына катышуу үчүн жөнөп кеткен.
Кыргызстандын президенти мындан эки күн мурда, 60 жашка чыгып, юбилейин белгилеген.
