БИШКЕК, 15-сен. — Sputnik. Президент Алмазбек Атамбаев Убактылуу өкмөттүн 2010-жылы сепаратисттердин лидери Кадыржан Батыровдун өлкөдөн чыгып кетишине тиешелүүлүгүн текшере турган жумушчу топ түзүүнү Башкы прокуратурага тапшырды. Бул тууралуу өлкө башчынын маалымат кызматы билдирди.
Өлкө башчы Алмазбек Атамбаев Башкы прокурор Индира Жолдубаевага ыйгарым укуктар менен гана чектелбестен, жумушчу топ түзүү зарылдыгын белгиледи.
"Чындыкты казып чыгуу канчалык оор экенин түшүнүп турам. Анткени анын ачыкка чыгышын каалабаган адамдар тоскоолдуктарды жаратат. Буга карабастан, эл чындыкты билиши керек", — деди Атамбаев.
Аталган топтун иши боюнча баш прокурор президентти кабардар кылып турмай болду.
Башкы прокуратура Кадыржан Батыров Жалал-Абад шаарынын соту тарабынан 2010-жылдагы июнь окуяларын уюштурууга күнөөлүү деп табылып, үй мүлкүн конфискациялоо менен сыртынан соттолгонун эскертет. Анткен менен Жогорку Кеңештин мурунку депутаты өлкөдөн качып кетүүгө үлгүргөн.
