БИШКЕК, 14-сен. — Sputnik. Кытайда окуган кыргызстандык 300дөй студент Бишкектеги Кытай элчилигине болгон жардыруудан кийин окуусун улантуу үчүн Кытайга кире албай турат. Бул тууралуу КР тышкы иштер министринин орун басары Азамат Үсөнов билдирди.
Белгилей кетсек, 30-августта эртең менен Бишкектеги Кытай элчилигинин дарбазасын жанкечти жардыргыч заттар салынган машина менен барып сүзүп, жардырган. Анын кесепетинен жан кечти каза болуп, элчиликтин бакчасында иштеген Кыргызстандын үч жараны жаракат алган. Жардыруудан кийин Кытай элчилиги Кыргызстандын жарандарына Кытайга кирүү үчүн виза берүүнү токтоткон.
Министрдин орун басары 300дөй студенттин Кытайга кире албай турганы боюнча маалыматы бар экенин айтат.
"Биз бул боюнча Кытай элчилигине эки жолу нота жиберип, анда студенттерге виза берүүнү тездетүүнү суранганбыз", — дейт ал.
Үсөнов ошондой эле элчилик жардыруу болгон учурда визаларды чыгаруучу аппарат жабыр тартканын билдиргенин маалымдады. Кытай тараптын билдиргени боюнча учурда элчиликке кайрылгандарды толук кабыл алуу үчүн шарт жок.
Буга чейин КР Тышкы иштер министрлиги убагында студенттик виза ала албагандарды ТИМдин консулдук кызматына маалымат берүүнү суранган. Алар өз кезегинде ал маалыматты Кытай тарапка бермек болушкан.
