БИШКЕК, 14-сен. — Sputnik. Казакстандык белгилүү продюсер Баян Есентаеванын Айсауле аттуу кызы "өз жубайын өлтүрүүгө аракет жасаган" деп айыпталып жаткан атасынын таламын сотто талашат. Бул туурасында Бахытбек Есентаевдин жактоочусу Бекболот Жексеитов билдиргендигин Newskaz агенттиги жазып чыкты.
Шаршемби күнү козголгон кылмыш ишине байланыштуу алдын ала угуулар өткөн.
"28-сентябрда катардагы соттук отурум өтүп, негизги соттук териштирүүлөр башталат", — деп билдирген жактоочу.
Жактоочу сот жабык түрдө өтө тургандыгын айтып, кененирээк маалымат берүүдөн баш тарткан. Бирок ал айыпталуучу Бахытбек Есентаевдин кызы Айсауле Есентаева сотто атасынын таламын талаша тургандыгын ырастаган.
"Айсауле айыпталуучунун коргоочусу. Атасынын коргоочусу", — деп билдирди жактоочу.
Белгилей кетсек, Баян Есентаева 10-июнь күнү бычакталып Талгар шаарынын ооруканасына жаткырылган. Кылмышка шектүү катары анын күйөөсү Бахытбек Есентаев кармалган. "Ден соолукка олуттуу зыян келтирген" деген берене кийин "Адам өлтүрүүгө аракет кылуу" беренеси менен алмаштырылган.
