КЫРЧЫН, 6-сен. — Sputnik. II Дүйнөлүк көчмөндөр оюндарынын алкагында өткөн ат чабышта биринчи орунду алган Жеңиш Батыркулов мээнети акталганын айтып берди.
Эске сала кетсек, Кырчында өткөрүлгөн эл аралык ат чабыша Кыргызстан, Россия жана Казакстандан 23 күлүк катышып, Ысык-Көлдүн "Ак кула" күлүгү марага биринчи болуп келген.
"Мен 25 жылдан бери чабандестик менен алектенип келем. Мындан сырткары, Чолпон-Атадагы "Асанбек ата" ат заводунда саяпкермин. Буга чейин ат чабыштарга катышып, 94 унаа уткам. Бүгүн жарыш калыс өткөндүгүн айткым келет. Баарыбызга бирдей шарт түзүлдү", — деди Батыркулов.
Саяпкер бул таймашка бир айдан ашык даярданганын кошумчалады.
"Өзүм Талас жергесинен болом. Буга чейин Казакстандын президенти Нурсултан Назарбаевдин байгесин утуп алгам. Эл аралык жарыш болгондуктан атайын Кырчын жайлоосунда бир айдан ашуун даярдандык. Буюрса, акыбетибиз кайтып отурат", — деди саяпкер.
Экинчи дүйнөлүк көчмөндөр оюндары 8-сентябрга чейин уланат.
Sputnik Кыргызстан маалымат агенттиги жана радиосу Дүйнөлүк көчмөндөр оюндарынын расмий медиаөнөктөшү болуп саналат.
