БИШКЕК, 1-сен. — Sputnik. Бүгүн саат 18:00дө унаалардын салыгын төлөө мөөнөтү аяктайт.
Анткен менен айдоочулардын айрымдары банк аркылуу салык төлөгөндүктөн атайын жабыштыргыч алган эмес. Маселени тактап берүүнү өтүнгөн окурман Sputnik Кыргызстан агенттигине WhatsApp-канал аркылуу кайрылган.
Мамлекеттик салык кызматынын ага инспектору Озорбек Молдобаев жабыштыргычтар сөзсүз түрдө чапталышы керектигин билдирди. Аны салык органдары акысыз берет.
"Эгерде айдоочу салык төлөп, бирок жабыштыргыч албай калса, аны Кайгуул милициясы токтотот. Бирок айдоочу квитанцияны көрсөтүп, жабыштыргыч алганы кетип жатканын айтып коюшу мүмкүн. Качанкыга чейин антип жүрмөк эле. Андыктан колдон келсе батыраак жабыштыргыч чаптаганы артык", — деди Молдобаев.
Кайгуул милициянын маалымат кызматы жол кыймылынын эрежесине ылайык, жабыштыргыч сөзсүз көрсөтүлүүчү документтердин катарына кирбей тургандыгын билдирди.
"Жабыштыргычтын бар-жогун салыкчылар текшерет. Ал эми эгерде квитанция жок болсо, Кайгуул милициясы 500 сом өлчөмүндө айып салат. Ал эми жабыштыргыч улам-улам болуучу текшерүүдөн куткарат", — деп айтылат маалыматта.
Өкмөттүн былтыркы жылдын ноябрь айында кабыл алынган "4-топтогу мүлк объектилерин үчүн салык төлөмдөрүн толук кандуу чогултууну камсыздоо жөнүндө" токтому Мамлекеттик салык кызматынын расмий сайтына жайгаштырылган.
Эгер кандайдыр бир өзгөчө окуяга же жаңылыкка күбө болсоңуз WhatsApp-каналга +996 706 566 544 номери боюнча кабарласаңыз болот.
