БИШКЕК, 16-авг. — Sputnik. II Дүйнөлүк көчмөндөр оюндарына карата курулуп жаткан ипподромдун курулушу соңуна чыкты. Бул тууралуу Sputnik Кыргызстан агенттигине Архитектура, курулуш жана турак-жай коммуналдык чарба мамлекеттик агенттигинин маалымат кызматы кабарлады.
Маалыматка караганда учурда ипподромдун аймагын тазалоо иштери жүрүп жатат.
"Ипподромдун курулуш иштери толугу менен бүткөрүлдү. Учурда жашылдандыруу, айлана-чөйрөнү тазалоо жана майда-барат ремонт иштери жүрүп жатат", — деп айтышты аталган кызматтан.
Экинчи дүйнөлүк көчмөндөр оюндары Ысык-Көлдүн жээгинде 3-8-сентябрь күндөрү өтөт. Мында 35 мамлекеттен келген спортчулар күрөш, салбурун, жаа атуу, интеллектуалдык оюндар жана спорттун башка түрлөрү боюнча ат салышат.
Sputnik Кыргызстан маалымат агенттиги жана радиосу Көчмөндөр оюндарынын расмий медиа өнөктөшү болуп саналат.
