БИШКЕК, 3-авг. — Sputnik. Алексей Попов атактуу режисер Стивен Спилбергдин "Терминал" тасмасындагыдай болуп үч күндөн бери "Манас" аэропортунун аймагынан чыга албай жатат.
Алексей Попов 31-июль күнү Краснодар — Бишкек каттамы аркылуу "Манас" аэропортуна конгон. Ал өткөрүү пунктунан паспортун эмес жашагандыгы тууралуу гана документ көрсөткөндүктөн аны чек ара кызматы өткөрбөй койгон.
"Алексей Поповдун тишелүү документтери жок болгондуктан биз аны өлкөгө киргизе албайбыз. Краснодарга кайра билет алганга тыйыны жок экен. Чек ара кызматы жанынан билет сатып бербейт да",— деп айтылат Чек ара кызматынын билдирүүсүндө.
Поповду депортация кылуу үчүн аны Кыргызстанга алып келген авиакомпания кайра артка жеткириш керек. Анткен менен кызмат көрсөткөн "Эйр Кыргызстан" компаниясынын директору Жолдошбек Бектурганов Бишкек — Краснодар каттамы аптасына бир гана жолу учаарын айтты.
"Кезектеги учак жекшемби күнү учууну пландап жатат. Ошондо Поповду кайра жеткиребиз. Аны өлкөгө киргизбей жаткандыгына биздин комания күнөлүү эмес", — деди Бектурганов.
Ал эми Поповдун туугандары аны үч күндөн бери ачка жатканын айтышууда.
"Терминал" — тасманын башкы каарманы АКШга учуп келген учурда мекенинде төңкөрүш болуп, анын паспорту жараксыз болуп калат. Айла жоктон баш каарман аэропортто күн кечирет.
