БИШКЕК, 19-июл. — Sputnik. Бишкек шаарындагы мечиттерге түндө үндү катуу чыгаруучу жабдуулардын үнүн азайтуу сунушталганын шаардык Санэпидкөзөмөл билдирди.
Маалыматка ылайык, шаар тургундары мечиттеги азандын үнү түндө катуу чыгып жатканын айтып арызданышкан.
Андыктан шаардык Санэпидкөзөмөл мечиттин башчыларына үндү катуу чыгаруучу жабдуулардын жаңырышын түндө азайтуу боюнча билдирме жиберди.
Ошондой эле муфтият менен да түшүндүрүү иштери жүргүзүлүп, түндө азандын үнүн азайтуу боюнча макулдугу алынганы маалыматта айтылат.
Бир жума бою берилген сунуштардын аткарылышы көзөмөлгө алынат.
Муфтияттан азырынча түшүндүрмө алууга мүмкүн болгон жок.
