БИШКЕК, 29-июн. — Sputnik. Стамбулдун "Ататүрк" аба майданындагы жарылуудан жарадар болгон 18 жаштагы Бахтияр Юнусовдун абалы жакшы экенин апасы Малика Юнусова Sputnik Кыргызстан агенттигине билдирди.
Юнусова учурда уулунун абалы жакшы экенин, Бахтиярды бир-эки сааттан кийин ооруканадан чыгарын белгиледи.
Буга чейин жаракат алгандардын арасында аты-жөнү кыргызстандыктарга окшош эки жаран бар экени кабарланган.
КРдин Стамбулдагы консулдугунун маалыматы боюнча жаракат алгандардын арасында Кыргызстандын жараны Бахтияр Юнусов бар. Жабыр тарткан экинчи жаран Рыфат Салимов Өзбекстандын жараны экени аныкталды.
"Баламдын абалы кудайга шүгүр, жакшы. Жаңы эле Кыргызстандын консулдугунан келип, ал-абалыбызды сурап кетти. Уулам аэропортко таанышы менен билет алууга барып, ушундай окуяга туш болду. Түнү менен дарыгерлер керектүү аракеттерди көрүп, жардамын беришти", — деди ал.
Кол колу сыйрылган Бахтияр быйыл 18 жашка толот.
Малика Юнусова алардын Түркияга келгенине 2 жылга жакындап калганын айтып, Бархтияр төрт баланын улуусу экендигин кошумчалады.
