ТАЛАС, 21-июн. — Sputnik. Талас шаарынын тургуну Гүлнара Иманкулова такси кызматынын бригадири жана айдоочусу болуп кызмат өтөйт.
Каарман Sputnik Кыргызстан агенттигинин кабарчысына мугалимдик жана такси кызматтарын аркалоого кандайча жетишип жатканын айтып берди.
"Талас шаарындагы 90-кесиптик лицейде эртең менен саат 8.00дөн 16.00гө чейин сабак берип келем. Муктаждыктын айынан үч жылдан бери сабактан кийин түнкү саат 12ге чейин унаа менен элди каалаган жерине ташыйм", — деп билдирди Иманкулова.
Анын айтымында, шаар боюнча эки гана айым "таксист" болуп иштейт. Иманкулова көпчүлүк эркектер рулда отурган айымдарды колуна жардыргыч кармап алган маймылга салыштырып, сыртын салып турарын кошумчалады.
"Жетер жерине жетип алып акчасын бергиси келбегендер арбын. Өткөндө эки кыз акысын төлөгүлөрү келбей убара кылышты. Куулукка салып оператор балага телефон чалып "атайын топту" жибергиле дегенде гана чочуп, төлөөгө мажбур болушту. Мас адамдар отурганда да мазаны алышат", — дейт айдоочу айым.
Аял айдоочулар жокко эсе болгондуктанбы, айтор, кардарлардын көбү үч суроону ар качан кызыгуу менен узатышат экен.
"Кардарлар жолдошуң жокпу, коркпойсуңбу, канча акча табасың деген үч суроону ар качан узатышат. Менин оюмча айым деген көп кырдуу болуусу керек. Унаа айдап, үй иштерине жетишип, эркектин да жумушун аркалоонун өөнү жок болсо керек", — деп кошумчалады Иманкулова.
Талас шаары боюнча такси кызматында иштеген эки гана айым бар. Анын бири Гүлнара Иманкулова болсо, экинчиси Талас — Жон-Арык каттамы менен зуулдаган Үрүл айым экени көпчүлүккө белгилүү.
