БИШКЕК, 7-июн. — Sputnik. Чолпон-Ата шаарына кире берген жерде жалгыз гана кытай тилинде жазылып, илинген темир жарнама тактасы мамлекеттик тил жөнүндө мыйзамды бузуп жатат деп билдирди Sputnik Кыргызстан маалымат агенттигине WhatsApp аркылуу күбө болгон жаран.
Илинген сүрөттүү жарнама кытай тилинде жазылып, компаниянын аталышы жана байланыш телефондору латын тамгалары менен көрсөтүлгөн.
"КРдин мамлекеттик тил жөнүндө" мыйзамынын 27-беренесинде кулактандыруулар, жарнамалар, прейскуранттар жана башка маалыматтар мамлекеттик тилде, андан соң расмий тилде, эгерде зарылчылык болсо, башка тилдерде жазылышы туурасында айтылган.
Ысык-Көл районунун акими Раимбек Имангазиев Sputnik Кыргызстан агенттиги менен сүйлөшкөндөн кийин ал жерге өзү барып, жогоруда айтылгандай, тагыраагы таза кытайча жазылган темир жарнамалык тактасы илинип турганындыгын тастыктады. Аким бул өзүм билемдик менен илингендигин айтты.
"Менде болгон маалыматтарга караганда, бул щитке (жарнамалык темир тактаны) жазууну кечээ жергиликтүү бийликке айтпай туруп илишкен. Буга 2000 сомдук айып пул салынат. Эртең муну териштирүүгө тапшырма беребиз", — деди Иманганзиев.
Sputnik Кыргызстан маалымат агенттигинин кабарчысы жарманамада жазылган байланыш телефон номуруна чалып, тактадагы жазуу туурасында сурады. Компаниядан бул окуя боюнча маалымат эртең гана такталат деген жооп айтты.
Эгер сиз кайсы бир окуяга күбө болуп, сүрөткө же видеого тартып алган болсоңуз, маалыматты биздин +996 706 566 544 WhatsApp номерибизге жөнөтсөңүз болот.
