БИШКЕК, 2-июн. — Sputnik. Кадамжайдагы селден улам дайынсыз жоголгон 3 жашар Элдар Жороевдин сөөгүн табуу үчүн Өзбекстандын күч кызматкерлери менен дагы сүйлөшүүлөр жүргүзүлүп, издөө иштери жүрүүдө. Бул тууралуу Баткен ОИИБдин маалымат кызматы билдирди.
Эске салсак, 27-май күнү Жийделик аймагында тынбай жааган жамгырдын кесепетинен сел жүрүп, ал адам өмүрүнө зыян алып келген. Ичинде жүргүнчүлөрү бар автоунаа сайга кулап, ичиндеги төрт чоң киши жана эки жаштагы бала каза болгон. Дагы бир алты жаштагы баланы куткаруучулар сактап калууга үлгүргөн. Ал эми сел агызып кеткен унаанын ичинде дагы бир үч жашар бала болгону айтылып, ошол эле күнү изделе баштаган.
Селден улам сайга кулап кеткен унаанын ичиндеги үч жашар бала суунун агымы менен Өзбекстандын аймагына кирип кетүүсү мүмкүн экенин өзгөчө кырдаал министри Кубатбек Боронов парламентке отчет берип жатып билдирген эле.
