БИШКЕК, 26-май — Sputnik. Билим берүү жана илим министри Элвира Сариева депутат Садык Шер-Нияздын айткан "Манастын" саптарын түшүндүрүп бере албай койду.
Депутат министр айымдан
"Коломсокко кол салып,
Колуна тартып ок чалып,
Киричине чалганча,
Коюп Манас кеткени" деген саптарды түшүнгөн-түшүнбөгөндүгүн сураган.
Эскерте кетсек, учурда Жогорку Кеңеште өкмөттүк саат өтүп, анда мамлекеттик тил маселеси талкууланып жатат.
"Мен тажик же фарс тилинде сүйлөгөн жокмун. Мен "Манас" эпосунан үзүндү окудум. Аны билим берүү министри түшүнбөй жатса, башкаларга сын айтуу кыйын. Ата-бабалардан калган сөздөрдү түшүнбөө — трагедия", — деди Шер-Нияз.
Мындан тышкары, депутат Кожобек Рыспаев мамлекеттик тилге тийиштүү көңүл бурулбай жатканын айтты. Ал башка тилден келген сөздөрдүн бардыгын кыргызча которуу керек экенин билдирди.
"Самолетту кыргыздар ойлоп тапкан эмес деп эле кыргызча которбой коюу туура эмес. Аталыштарды кыргызча эле айтканыбыз жакшы. Мындан тил кемибейт, тескерисинче байыйт", — деп билдирди Рыспаев.
Депутат вице-премьер Олег Панкратовдун мамлекеттик тил билерине да кызыкты.
"Панкратов Дастан Бекешовго окшоп кыргызча үйрөнүп жатабы? Эгер түшүнүп, билип калса кийинки жыйындарда Панкратовго кыргызча суроо узаталы" — деди депутат.
Жыйынга катышып жаткан вице-премьер Гүлмира Кудайбердиева Панкратов ушу тапта кыргызча үйрөнүп калганын белгиледи.
