БИШКЕК, 22-май — Sputnik. "Кыргызстан сулуусу — 2016" сынагынын жеңүүчүсү аныкталганын Sputnik Кыргызстан агенттигине иш-чаранын уюштуруучусу Таттыбүбү Самидин кызы билдирди.
Сынак 21-май күнү өттү. Ага кымча бел 15 бийкеч катышты. Уюштуруучунун айтымында, кыздар сынакка акысыз катыша алышты.
"Кыздар болгон аракетин жумшап иштешти", — деди ал.
Сынакта Бишкек шаарынан 18 жаштагы студент Перизат Рыскулбек кызы жеңүүчү аталды. Жеңүүчү конкурс аябай татаал болуп, атаандаштык күч болгонун айтып берди.
"Биз калыстар тобу аябай катаал болот деп ойлогон эмеспиз. Атым аталганда аябай таң калдым", — деди сулуу.
Уюштуруучулардын айтымында, сынактын жеңүүчүсү "Дүйнө сулуусу-2016" конкурсуна катышат. Былтыр бул сынакты испаниялык Мирея Лалагуна жеңип алган. Ал эми Кыргызстандын былтыркы конкурсун Таттыбүбү Самидин кызы уткан.
