БИШКЕК, 30-апр. — Sputnik. Бишкектин коомдук унаа каттаган асфальт жолдорундагы жол чийиндер май айында ак-сары түскө боёлот. Бул тууралуу Sputnik Кыргызстан агенттигине Бишкек асфальт муниципалдык ишканасынын жетекчиси Мирлан Амантуров билдирди.
Анын айтымында, жол чийиндерин жаңыртууга жалпысы 30 миллион сом жумшалат.
"Бөлүнгөн каражаттын 20 миллион сому термопластка кетсе, 10 миллиону сырга жумшалат. Учурда биз жол чийиндерин жаңыртууга даярбыз. Бирок аба ырайы жаанчыл болуп жаткандыктан токтоп турабыз", — дейт Амантуров.
Анын айтымында, боёкту "Кама", ал эми термопластты "Нур трафик" ишканасы алып келмей болгон.
"Сырга алты ай, термопластка бир жылдык кепилдик берилген. Эгер мөөнөтүнөн мурда өчүп кала турган болсо, аталган компаниялар чыгымды төлөп берүүгө милдеттүү болушат", — дейт Амантуров.
Ал белгилегендей жол чийиндерин чийүү май айынан 1-июнга чейин уланып 60 күндүн ичинде бүткөрүлөт. Бирок жаан токтобой турган болсо мөөнөтү ары жылышы ыктымал.
Эрежеге ылайык жол чийинин чийүү үчүн аба ырайы 15 градустан жогору болуусу керек.
