БИШКЕК, 11-апр.—Sputnik. Үстүбүздөгү жылдын 10-июнуна чейин орто мектептин окуучуларына жеке идентификациялык номерлер ыйгарылат. Бул тууралуу Мамлекеттик каттоо кызматынын маалымат кызматы билдирди.
Ага ылайык, Мамлекеттик каттоо кызматы Билим берүү жана илим министрлиги менен биргеликте эки айдын ичинде бир миллионго жакын окуучуга идентификациялык номер берүүнү пландап жатат.
Берилген номерлер окуучулардын ата-энесинин пин-номерлерине байланыштуу болот.
Бүгүн, 11-апрелде аталган мекеменин жетекчиси Тайырбек Сарпашевдин катышуусунда жаңы программалык камсыздоонун презентациясы өткөрүлдү.
"Бул иш электрондук өкмөттү түзүү долбоорунун алкагында жүрүп жатат",— деп билдирди Сарпашев.
Ал жыл аягына чейин архивдердеги 16 миллион документти дагы электрондоштуруу пландалып жатканын айткан.
Маалыматка ылайык, учурда беш миллион маалым кат баракчалары электрондук форматка өткөрүлгөн.
