БИШКЕК, 11-апр. — Sputnik. Чоң-Алайдагы "Карамык" чек ара заставасында жоголуп кеткен Бексултан Бааридиновдун ата-энеси жана туугандары Ак үйдүн алдына митингге чыгып, баласын таап берүүнү талап кылышууда.
Былтыр август айында Ош облусунун Чоң-Алай районундагы "Карамык" чек ара заставасында кызмат өтөгөн Бексултан Бааридинов нөөмөт учурунда жоголуп кеткен. Аны издөө азырынча жыйынтык бере элек. Кийин ал ууга чыккан боюнча кайтып келбегени маалым болгон.
Бааридиновдун апасы Майрам Закирова учурда баласын аскерге чакырган өкмөт аны таап берсин деген талапты койгон 20дай тууган-туушканы менен Ак үйдүн алдында турганын айтты.
"Менин, күйөөмдүн туугандары митингге аргасыздан чыктык. Баламдын жоголгонуна жарым жылдан ашты. Бирок, жыйынтык жок. Баламды аскерге чакырган өкмөт аны таап берсин. Биз президентке жолукмайынча кетпейбиз. Өлкө башчысы менен бетме-бет көрүшүүнү каалайбыз", — деди ал.
Закирова аларга өкмөттөнмүн деп бир киши чыгып, телефон номерлерин жазып алып, тийиштүү кишилер менен жолуктурарын айтканын белгиледи.
Буга чейин Мамлекеттик чек ара кызматы жоголуп кеткен аскерди издөө иштери токтоосуз жүргүзүлүп жатканын билдирген.
