БИШКЕК, 5-мар. — Sputnik. УКМКдагы өрттөн жабыркагандардын алтоосу ооруканада дарылануусун улантып жатканын Sputnik Кыргызстан агенттигине Бишкек Саламаттык сактоо департаментинин башчысы Кубанычбек Кулбатыров билдирди.
Жума күнү кечинде Улуттук коопсуздук боюнча комитеттин имаратында өрт чыккан. Мекеменин расмий өкүлү Рахат Сулаймановдун айтымында, кырсыкка электр зымдарындагы чыңалуу себеп болгон. Тез жардам кызматы өрттөн тогуз адамдын жабыркаганын маалымдаган.
Кулбатыров ооруканага УКМКнын тогуз кызматкери түшкөнүн тастыктады. Анын үчөө жатып дарылануудан баш тартышкан. Калган алты кызматкер шаардык төртүнчү оорукананын токсикология бөлүмүндө дарыланууда.
"Үчөөнүн абалы оор, калган үчөөнүкү канааттандырарлык", — деди ал.
Жабыркагандардын баары иске ууланганы айтылууда.
