БИШКЕК, 4-мар. — Sputnik. 23 жаштагы Тилек Шабаевди атып өлтүргөн Чүй облусунун Жол кайгуул кызматынын инспектору Вахитжан Салимбаев Москва райондук соту тарабынан шарттуу түрдө эки жылга кесилгенин Башкы прокуратуранын маалымат кызматынын өкүлү Нурлан Тагаев билдирди.
ИИМдин маалыматы боюнча былтыр 11-июнда болжол менен саат 21.30да ЖКК инспектору Салимбаев "Ниссан Альмеро" унаасынын 23 жаштагы айдоочусу Тилек Шабаевди кызылдан өтүп кеткени үчүн атып салган. Окуя Чүй облусунун Беловодск айылында болгон. Ал эми күбөлөрдүн айтымында, инспектор айдоочуга эч себепсиз эле ок чыгарган.
"Москва райондук соту 97-беренени (Киши өлтүрүү) 101-беренеге (Кокустуктан улам өлүмгө алып келүү) алмаштырды. Мындан тышкары, маркумдун туугандары да тосмо арыз жазып бергени белгилүү болду", — деди Тагаев.
Ал соттун чечимине Чүй облустук прокуратурасы макул эместигин белгиледи.
"Бейшемби күнү Москва райондук прокуратурасы Чүй облустук сотуна аппеляциялык доо арыз менен кайрылды. Салимбаев учурда Бишкектин №1 тергөө абагында камакта отурат", — деди прокуратуранын өкүлү.
Маркумдун туугандарынын айтымында, тосмо арызды тилектин атасы Шурубек Шабаев жазып берген.
Былтыр Sputnik Кыргызстан агенттигине берген маегинде Шурубек Шабаев эгер сот адилеттүү чечим кабыл албаса, айыпталуучуну өзү "соттой" турганын айткан. Муну менен бирге Шабаев президентке да кайрылуу жөнөткөн.
