БИШКЕК, 1-мар. — Sputnik. Узундугу үч метрге жеткен калпак ыктыярдуу студенттер тарабынан жасалып жатканын Sputnik Кыргызстан агенттигине уюштуруучулардын бири Адилет Кубанычбеков билдирди.
Анын айтымында, демилгени Кыргыз–Түрк "Манас" университетинин студенттик кеңеши көтөрүп чыккан.
"5-март ак калпак күнүнө карата узундугу үч метр болгон калпак жасалууда. Ак кийизден тигилип, оймолору кара түстө болот. Максатыбыз — улуу баалуулуктарды даңктоо, урматтоо",— дейт Кубанычбеков.
Демилгечилер бул калпакты Гиннес китебине киргизүүнү көздөп жатышат.
"Жакшы тилек менен кыргыздын эң чоң калпагын жасап Гиннестин рекорддор китебине киргизүүнү көздөп жатабыз", — дейт активист.
Калпакты студенттердин демилгеси менен атайын чеберлер жасашууда. Кеткен чыгымды студенттер өзүлөрү чогулткан.
Кыргыздын улуттук баш кийими тууралуу баардык маалыматты Sputnik инфографикасынан көрө аласыздар>>
