БИШКЕК, 22-фев. — Sputnik. Ички иштер министри Мелис Турганбаев журналист Турат Акимовдун койгон айыбы суу кечпейт деп эсептей турганын ИИМ басма сөз катчысы Бакыт Сейитов маалымат жыйында билдирди.
Сейитовдун айтымында, 18-ноябрда министр Акимов менен журналисттин жеке суранычы менен жолуккан. Анда Акимов Турганбаевден кимдир бирөө менен жолуктурууну өтүнгөн. Бирок ал адам чет өлкөгө чыгып кеткендиктен, жолугушуу ишке ашпай калган.
"Министр Акимовдун сүрөтүн көргөндөн кийин анын ким экенин эстеди. Бирок журналисттин койгон күнөөсү эч негизсиз. Министр муну болбогон сөз деп эсептейт. Буга реакция да кылбайт, сотко да бербейт", — деди Сейитов.
Анын айтымында, ИИМ башчысынын душманы көп. Президенттик аппараттын мурдагы жетекчиси Медет Садыркуловдун өлүмү сыяктуу иштердин бетин ачкандыктан маалымат каражаттарында да көп сынга кабылат.
Маалымат кызматынын жетекчиси Акимовго кол салгандар боюнча шектелип жаткан адамдар бар экенин белгиледи.
