БИШКЕК, 10-фев. — Sputnik. "Себат" билим берүү мекемесинин Бишкек шаарындагы Чыңгыз Айтматов атындагы кыргыз-түрк эркек лицейинин он бир окуучусунан сарык вирусу (гепатит А) табылганын шаардык санитардык-эпидемиологиялык борборунун башкы дарыгеринин орун басары Курманбек Омуралиев Sputnik Кыргызстан маалымат агенттигине тастыктады.
Ал сарык тууралуу билдирүү 25-январда шашылыш түрдө келгенин кошумчалады. Ошондой эле, бул оору санитардык нормаларды жана жеке гигиенаны сактабагандыктан болорун Омуралиев белгиледи.
"Учурда аталган окуу жайдын жетекчилигине, окуучуларга санитардык нормаларды сактоо керектиги жана жеке гигиенаны сактоо боюнча атайын агартуучу лекциялар өтүлүп жатат. Гепатит "А" вирусу бул "кир колдун оорусу" деп айтылат. Андыктан тазалыкты сактоо кажет", — деди ал.
Омуралиев ошондой эле, аталган лицейдин жетекчилигине административдик чара көрүлүп, тийиштүү үч кызматкерге алты миң сом айып салынганын кошумчалады. Сарык вирусу 7-класстан 11-класска чейинки окуучулардан табылганын ал белгиледи.
"Себат" билим берүү мекемесинин маалымат кызматы билдиргендей, үчүнчү чейрек башталгандан кийин 25-январда эки окуучу лицейдин санитардык бөлүмүнө кайрылган. Алардын ата-энелери чакыртылып, балдарды ооруканадан текшертүү үчүн өздөрүнө тапшырылган. Алынган анализдердин жыйынтыгы менен окуучулардан гепатит "А" вирусу табылган.
Учурда лицейдеги кырдаал боюнча жумушчу топ түзүлдү. Алар күн сайын балдардын ден соолугун, жатакана, класстардын жана ашкананын санитардык абалын көзөмөлдөп, тийиштүү чараларды көрүп жатканын "Себат" билим берүү мекемесинин маалымат кызматы кошумчалады. Андан сырткары санитардык эпидемиологиялык борбордон ушул күнгө чейин үч жолу текшерүү болгон.
Ал эми Билим берүү министрлиги аталган окуянын чоо-жайын иликтеп жатканын маалымат кызматы билдирди.
