БИШКЕК, 10-фев. — Sputnik. Бүгүн, 10-февралда Аксы районуна караштуу Кара-Жыгач айылында жергиликтүү тургундар тынчтык митингине чыгышканын айыл өкмөттүн башчысы Батыркул Шабданов Sputnik Кыргызстан агенттигине билдирди.
Анын айтымында, нааразычылык акциясына 200гө чукул адам чыкты. Алар социалдык фондго төлөмдөрдүн жогорулаганына нааразчылык билдирип, электр энергиясына тарифтерди арзандатуу, Мамлекеттик камсыздандыруу мыйзамын жокко чыгаруу, балдарга жөлөк пул берүүдөгү документ иштерин жөнөкөйлөтүү талабын коюшту.
"Чогулган эл менен Эмгек жана социалдык өнүгүү министринин орун басары Эрик Куйкеев менен Аксы районунун акими Медер Айдаралиев жолугушуп, талаптарын жогору жака жеткирерин айтышты", — деди Шабданов.
Ал эми уюштуруучулардын бири Шекербек Камчыбек уулунун айтымында митингге 400дөй адам келди.
"Биз бийлекке өз талаптарыбызды койдук. Алар убакыт сурап, жогорку жакка жеткиребиз деген убада беришти. Резолюция кабыл алып, 20-февралга чейин убакыт бердик", — деди Камчыбек уулу.
Эгерде бул талаптар аткарылбаса, аксылыктар Кербен шаарында чоң митинг уюштурабыз деп жатышат.
