БИШКЕК, 22-дек. — Sputnik. Ош шаарынын мэри Айтмамат Кадырбаев шаар тургундарына, шаардык мекеме-уюмдардын жамааттарына Жаңы жылдык жамааттык отуруштарды өткөрбөө боюнча кайрылуу жасады.
Муну калаа башчысы Жаңы жыл үй-бүлөлүк майрам катары саналгандыктан, үй-бүлөнүн бекемдигин, ынтымагын, бакыбаттуулугун чыңдоого багытталган кадам катары баалады деп билдирди Ош шаарынын мэриясынын маалымат кызматы.
"Мэр ысырапчылыкка жол бербей, мамлекеттик бюджет менен катар мындан ары үй-бүлөлүк бюджетти да сарамжалдуу пайдаланууга үндөдү", — деп жазды маалымат кызматы.
Мэрия элди 2016-жаңы жылды сергек жашоо үлгүсүндө сарамжалдуу тосуу максатында мэрия тарабынан уюштурулган түрдүү оюн-зоокторду, концерттик программаларды, кинотасмаларды көрүүгө чакырган.
