БИШКЕК, 20-дек. — Sputnik. Премьер-министр Темир Сариев Бишкектеги Калкты тейлөө борборунун ачылышына катышып, паспорттор мындан ары эки саат ичинде автоматташтырылган тутум аркылуу берилерин айтты. Бул туурасында өкмөттүн маалымат кызматы билдирди.
Премьер-министр борбор жарандарга тейлөө көрсөтүүнүн сапатын жакшыртуу жана ар кандай бюрократиялык убаракерчиликтерди жок кылуу максатында түзүлүп жаткандыгын билдирди.
"Биз бүгүнкү күндүн талабына жараша алгачкы кадамдарды жасоодобуз. Жаңы борбордо бардык тийиштүү документтер электрондук форматта тапшырылат. Быйыл жалпы республика боюнча бул сыяктуу үч борбор ачылат. Ал эми 2016-жылы Калкты тейлөө борборлору ар бир облустук борбордо андан соң ар бир райондо түзүлɵт", — деди Сариев.
Ал документти берүү мөөнөтү жаңы технологиянын жардамы менен тездетиле тургандыгын билдирди.
"Өзгɵчɵ белгилеп кетүүчү нерсе, Калкты тейлөө борборунда паспорттор ыкчам тартипте эки саат ичинде "Паспорт" деп аталган автоматташтырылган маалыматтык тутумун колдонуу аркылуу берилет", — деди өкмөт башчысы.
Премьер-министр бирдиктүү автоматташтырылган тутум студенттердин, мектеп бүтүрүүчүлɵрүнүн, пенсионерлердин, мүмкүнчүлүгү чектелген жарандардын так эсебин жүргүзүүгɵ шарт түзɵрүн кошумчалады.
Анын айтымында, ошол эле учурда алар кыска мɵɵнɵт ичинде тийиштүү документтерге ээ боло алат.
