БИШКЕК, 13-ноя. — Sputnik. Кийинки жылдын экинчи жарымынан баштап кыргызстандыктарга жапырт биометрикалык ID-паспорт берүү жараяны баштала турганын Мамлекеттик каттоо кызматынын жетекчиси Тайырбек Сарпашев ПРООНдун Кыргызстандагы өкүлү Александр Аванесов менен жолугушуу учурунда билдирди.
Төрага бүгүнкү күндө мамлекеттик кызмат системасына биометрикалык технологияларды киргизүү боюнча жол картасы дээрлик даяр экенин, буга жарандарды биометрикалык паспорт менен камсыздоо да кире турганын белгиледи.
"2016-жылдын жарымынан тарта жарандар массалык түрдө биометрикалык ID-паспорт менен камсыздала баштайт. Биометриянын мамлекеттик кызмат системасына киргизүү жарандардын жеке маалыматынын коопсуздугун сактоо жана калк жашоосун жеңилдетүүнү көздөйт", — деди Сарпашев.
Аванесов өз кезегинде кыргыз өкмөтүнүн биометрикалык технологияларды киргизүү боюнча жасалып жаткан кадамдарга оң баа берип, бул жаатта Кыргызстан ПРООНдун колдоосуна таяна ала турганына ишендирди.
Жолугушууда биометрикалык ID-паспорттордун негизинде шайлоочуларды идентификациялоо боюнча пикир алмашуу болуп, кызматташуунун келечеги талкууланды.
