БИШКЕК, 23-авг. — Sputnik. Өкмөт башчы Темир Сариев Мамлекеттик каттоо кызматынын жетекчиси Алина Шаиковага пенсионерлердин саргая кезек күткөнүн тез арада жөнгө салууну тапшырды. Бул тууралуу өкмөттүн маалымат кызматы билдирет.
Өкмөттүн маалымат бөлүмүнүн жетекчиси Назира Ахмедова, премьер-министр видеону көрүп, МКК жетекчиси Шаикова менен телефон аркылуу байланышып, абалды тез арада жөнгө салуусун тапшырган.
"Кары адамдарга бардык ыңгайлуу шарттарды түзүп берүү керек — паспорт алуу үчүн келди, алды, кетти. Бүттү. Маселе жакын арада чечилсин", — деп өкмөт башчынын сөзүн келтирди Ахмедова.
Буга чейин Шаикова Sputnik кабарчысына өкмөттүн эски үлгүдөгү (1994-жылкы) паспорт 1-сентябрдан тарта жараксыз боло тургандыгы тууралуу токтому чыкканын ырастаган. Социалдык фонд эски паспорттуу жарандарга пенсия берилбеши жөнүндө эч кандай буйрук келбегенин маалымдады.
